धरती ले पहली पईत दूरबीन ले दिखही अकास के खरहेरा

गांव म डोकरी दाई मन बतावंय के रात कन अकास म खरहेरा उथे। लईकई म आप जमो झन ह ये खरहेरा ल समे-समें म देखे होहू। येला हिन्‍दी म धूमकेतु कहिथें। अकास के जिनिस मन के खोज करईया संस्‍था नासा के वैज्ञानिक मन एसो अकास म उवईया खरहेरा के खोज करे गए हे। ये हफ्ता ये बहुुतेच कम दिखईया खरहेरा मने धूमकेतु ल पहली पईत दूरबीन ले देखेे जा सकही। ये हप्‍ता के बाद ये खरहेरा ह हजारों साल के चक्‍कर मारे बर फेर दूरिहा चल दीही।




नासा के सेंटर फॉर नियर अर्थ स्टडीज के पॉल चोडास ह बताइस के से चारहेरा जेकर नांव धूमकेतु सी-2016यू-1 नियोवाइज हे तेला दूरबीन ले देखे के उदीम करबोन। ये ह बिहनियाले थोकुन पहिली झ़लझ़लहा बेरा म थोकन समें बर उत्‍ती-रकसहूं कोति आकाश म दिखही। ये ह 14 जनवरी के दिन सूरूज के एकदम लकठा माने बुध ग्रह के कक्षा म घुसर जही जेकर पाछू ये ह बहिरा जही अउ हजारों बछर के जात्रा म अछप हो जही।